Лустрацијата е мртва. Да живее УДБА! Сосе кодошите…
Уставниот суд на денешната седница донесе одлука со која се укинуваат 4 клучни членови од фамозниот закон за лустрација со несмасно и проблематично име „Закон за определување на дополнителен услов за вршење на јавна функција“ (Сл.весник 14/08 од 29.01.2008). членот 2 став 1 во делот „до денот на влегување во сила на овој закон“, членот 8 во делот „и го објавува во `Службен весник на РМ`“ и членовите 13 и 34 од Законот за лустрација.
За појаснување – оневозможено е спроведувањето на лустрацијата после 1991 година, објавувањето на имињата на кодошите во Службен весник, како и спроведувањето на лустрација во верските заедници, религиозните групи и невладините организации. Со тоа Уставниот суд ја запечати судбината на лустрацијата уште пред таа асолно да почне. И тоа со право!
Не, не ја спорам во основа оваа одлука. Ако нешто му забележувам на Уставниот суд е тоа што не собра доволно сила да го укине целиот закон како неуставен (за што има доволно аргументи) и со тоа овозможи започнување на нов правичен, праведен, транспарентен и демократски процес со кој еднаш засекогаш ќе беше затворено ова значајно прашање . Тоа претполага донесување на еден сосема нов закон и нова демократска постапка по примерот на таквите процеси во Бугарија, Чешка, Полска, Источна Германија и некои други посткомунистички земји. Со ваквата одлука, практично се легализира една квази постапка на тобожна лустрација и оневзоможи нов процес со што Македонија заедно со Албанија (таму дури во два наврати е донесен закон кој поради силната исполитизираност никако да се спроведе) се единствените земји кои сеуште не расчистиле со рецидивите на минатиот систем.
Да бидам искрен, оваа одлука воопшто не ме изненади, а уште помалку ваквата разврска. Уште кога се појави Законот оценив дека е обична циркуска претстава за замајување на јавноста промашена уште во старт.
За една таква тврда негативна оценка основата ја црпев од предлагачот (Стојан Андов) кој и самиот би требало да биде опфатен со неа ако за ништо друго (неговите потврдени релации со Сојузните служби за безбедност) туку како неизбежен корисник на информациите на тајните служби кои ги користел ef officio (по службена должност) како носител на повеќе јавни функции!
Вториот извор за сомневање беше главниот подготвувач на Законот Звонимир Јанкуловски кој замислете без око да му трепне јавно изјавува дека се’ до 1999 година незнаел за аферите и дека опозиционата ВМРО ДПМНЕ постојано била под третман на СДБ/ДБК??? Знам дека Јанкуловски провидно одработува некои стари долгови кон Доста Бугарката како нејзин некогашен протеже’ (преку неа и кон Фрчкоски), но во најмала рака неумесно е дрско и безобразно (при толку многу докази и живи непосредни сведоци) да се прави „на удрен“ дека не слушнал или не прочитал за аферите „Дувло“, „Сина птица“ (обелоденети уште 1992 година), „Темел“, „База“, „Павароти“… за многубројните политички досиеја на речиси сите членови од раководните структури на тогаш опозиционата ВМРО ДПМНЕ! Кај ли бил човеков сите овие транзициони години???
И на крај секако контроверзниот закон кој уште со насловот самиот се класифицира како закон од сферата на работните односи, а не како основ за правно – политички процес со кој на конкретен и симболичен начин едно демократско општество ќе раскрсти со своето недемократско минато. Токму тука лежи основот за неуставност на целиот закон: никој надвор од уставните одредби не може да определува некој друг услов без оглед на оправданоста се’ додека тоа не биде вметнато во него со амандман! Згора на тоа токму овој член генерира селективност и неправичност дури и да се спроведе во дело: на удар на лустрацијата можат да се најдат само оние лица кои се актуелни носители на јавни функции или оние кои ќе претендираат во наредните 2 – 3 години (до денот на важењето на законот) додека сите други остануваат нечепнати без оглед на нивната улога во репресивните процеси на тајните служби во изминатиот период. Се разбира за некои постапки на тајните служби не е доволно само оневзоможување на доаѓање до одредени функции туку неизбежни се и судски процеси, за што (верувале или не) се залага и самиот Фрчкоски во една негова неодамнешна колумна!
Она што ме насмеа во целата оваа ситуација е образложението на Уставниот суд за ваквата одлука дека после 1991 година во Македонија бил воспоставен демократски систем на власт (!) и затоа лустрацијата не можела да се однесува на транзициониот период! По кој тоа критериуми оценил и од каде се појавија оние илјадници досиеја на политичките опоненти и многубројни афери токму во овој „демократски период“ веројатно знае само судот.
Планирав да се осврнам и на некои други аспекти на овој процес (валидноста на документацијата, налогодавачите, корисниците на информациите, и секако некои конкретни случаеви), но после ова сметам дека е излишно.
Нема пруга натаму, па тоа ти е…
Лустрацијата е дефинитивно мртва…
Да живее УДБА! Сосе кодошите…
The URI to TrackBack this entry is: http://makedon.blog.mk/2010/03/24/lustracijata-e-mrtva-da-zhivee-udba/trackback/
Alexandro
………………..
И ЌЕ ЖИВЕАТ ОД ТРОШКИ.
ВЕ ЛАЖАТ ОВИЕ СТАРЦИ
ДА БАРАТЕ ШПИУНИ КАЈ ПИЛИШТАРЦИ.
ВРАТЕТЕ СЕ НИЗ ВРЕМЕТО
ПОГЛЕДНЕТЕ ОД КАЈ ИМ Е СЕМЕТО.
ВО ОВАА ГРМУШКА
ЗАЈАКОТ ЛЕГНАЛ.
НИЗ ВЕКОВИ СЕ ШУШКА
………………….
Мастапе,
Ај во твој стил:
Лустрацијата
носи фрустрација
за некои кодоши
намсто лустрација
треба кастрација!
Alexandro
и самиот знаеш дека доколку постои било што неосновано за тебе во било кое досие можеш да тужиш. Ако била покрената постапка а не ти било овозможено да ги видиш доказите и пријавата тогаш можеш да го тужиш судијата кој тоа го одобрил итн итн.
Уставот од 1991 година ги обезбедува тие права.
А ако законот не чини тоа не е проблем на уставниот суд туку на парламентот кој тој закон го изгласал. Дури не е ни на предлагачот, зашто ако законот не чинел парламентот е филтерот низ кој треба таков закон да се елиминира.
поздрав
Andrej,
Како ќе дознаеш што пишува за тебе во досиејата на УДБА? Јас ја имав таа среќа и дознав (сакаш да ти ги доставам насловите на меил?). Шокиран сум и од дрскоста и од глупоста и од простотилакот.
Кого да тужам???
И врз основа на што кога самиот закон го оневозможува тоа.
Не си го прочитал внимателно постот. Не го критикувам Уставниот суд што ги укина овие одредби туку што не собра сили да го укине целиот закон! И така овозможи вистинска и правична лустрација преку донесување на сосема нов закон. Вака само ја легализира глупоста. Тоа што законот го донел Парламентот ништо не значи. Токму во него е главниот извор на македонските контроверзи и проблеми.
Поздрав!
ако не им напрајме кастрација
ќе имаме уште потупа нација
ова не е заебанција
на сите треба да им следи санкција
па нормално дека се мисли на кодоши
од нив ми се лоши . . .
Alexandro
во моментот кога тоа досие ке се користи против тебе имаш право да бараш да ти се презентираат доказите. Па ако има било што што сметаш дека е кодошење, тогаш имаш право да тужиш.
До тогаш тоа си е само досие, кое ништо не значи. Такви имало и секогаш ке ги има. инаку не би можела да функционира безбедноста во ниту еден сегмент. Се разбира има исправни и неисправни докази. По едните се постапува а другите само се евидентираат.
Уставниот не е за да оценува квалитет на закони туку дали некој членови се во спротивност со Уставот и други закони. А квалитетот требало во парламент да се подготви. Мислам дека овој закон е само за поткусурување и дека никому не е до лустрација 20 години по осомостојување. Но ако таа се продолжи до 2008 тогаш ке биде типичен пример за реваншизам кој ке доведе до несогледиви последици.
Дури лично сметам дека и одредени постапки на министарот за правда како што се пресудите за Андоновски, Митева, постапката против Бучковски ке отворат една лавина на простор за реваншизам зашто се донесени без некоја основа сем политичка. Но тоа е друга тема.
Што се однесува до досиејата мислам дека постои закно за увид во досиејата од 2000 или 2001 година. И тоа нема врска со лустрацијата. Посебен закон е.
Андреј,
Да токму тоа сакав да ти го соопштам. Тој закон не важи повеќе. Кој успеа да си го земе досието (мошне внимателно дотерано и фризирано) успеа. Во него ги нема кодошите (пречкртани се) а голем број на документи не се ни внесени. Тие досиеја се само за лично информирање и никој не може да покрене никаква постапка пред суд или било кој друг орган! Последиците од обработката од тајните служби ти можеш само да ги соетиш и да претпоставиш, но никој нема да ти потврди дека тоа што ти се случува е псоледица на тоа. Така било со фамозната морално – политичка безбедност така ќе биде и во иднина со сега прекрстената „безбедносна подобност“. Си слушнал за нив???
Неуставноста на законот не ја гледам во нејзниот квалитет туку токму во неговата содржина која е антиуставна уште во насловот. Законите мора да се однесуваат на сите граѓани или пак на сите оние припадници на поблиску дефинирана група. Во конкретниот случај законот не се однесува на оние кодоши кои сега не се наоѓаат на јавни функции или пак нема да пројават такви амбиции во периодот додека законот важи (според член 42 до февруари 2013 година).
Постапките кои ги споменуваш не влегуваат по ниеден основ во овој процес.
Сè е ветер и магла! Ние сме комплетна фатаморгана во мислите на слугите на ѓаволот! Еби га, сега место законска лустрација, дали ќе ни се случува народ? Значи ли тоа дека сега секој секого ќе го „лустрира“? На пример, би сакал да ги видам во медиумите сладострасните документи за членовите на Уставниот суд. Уф што ќе биде сензационално.
Еве интересна византиска финта:
Најавуваш изградба на црква на плоштад, иако немаш намера навистина да ја изградиш. Ама, опозицијата се буни против тоа, и можеш пред народот да се фалиш дека твојот политички непријател е против верата.
Најавуваш закон за лустрација. Немаш никаква намера навистина да изведеш лустрација, ама опозицијата се буни против тоа, и прави се за да го запре. Потоа, се фалиш пред народот дека политичкиот непријател е против лустрацијата.
Најавуваш борба против олигарсите и криминалната приватизација. Политичкиот опонент се буни против тоа со сите сили, и иако ти си немал никаква намера вистински да се бориш против нив, кога ќе биде запрен процесот, ќе се фалиш пред народот дека опозицијата јасно се ставила во заштита на олигарсите.
… и така си византисуваш се додека не ти се случи падот на Константинопол. И после кој друг ако не Цацко ќе ти биде крив што си глумел реформатор, наместо стварно да бидеш реформатор.
Во коментарот до Андреј ми се поткрадна грешка (така е кога нема опција едит) – наместо „морално политичка безбедност“ треба да стои “морално политичка ПОДОБНОСТ“.
Се извнувам на читателите.
Проксандар,
Сосема си во право. На овој начин – со ваков килав закон оневозможена е легална лустрација. На незадоволните не им преостаува друго освен пронаоѓање на алтернативни форми на лустрација. Ќе биде весело… и забавно, разбира се!
Да живее интернетот!
Поздрав!
Нено Богдан,
Потпишувам!
Тоа ми беше поентата на постот иако поради брзањето заради актуелноста на темата незнам колку успеав да бидам убедлив. Изгледа дека целокупната македонска политика досега е всушност парада на глумата. И тоа лоша, аматерска…
Поздрав!
И Нено и Богдан погодиа у центар.
Alexandro
ти бараш реваншизам или лустрација.
Во конкретниот случај законот не се однесува на оние кодоши кои сега не се наоѓаат на јавни функции или пак нема да пројават такви амбиции во периодот додека законот важи (според член 42 до февруари 2013 година).
Тие кои не се на државна функција и нема потреба да се лустрираат. Лустрацијата е заштита на државата од кодошите кои станале политичари после 1991 а не и реваншизам кон сите кодоши. Ако сакаш реваншизам не треба лустрација туку треба да се даде пристап до архивот на сите досиеја и еве како што е наведено во законот да се објават во службен весник, на телевизија дури и во поштанско сандаче списокот на секого да му се достави.
Па лустрација се прави за да од политика се исфрлат тие луѓе а не да се спроведва реваншизам. Еден таков реваншизам ке биде погубен за Македонија, познавајки го нашиот менталитет.
Андреј,
Кај гледаш реваншизам?
Ако го прифатиме тврдењето на Уставниот суд дека после 1991 година во Македонија биле конституирани демократски институции тогаш како да го објасниме она што овлаш го нафрлив во постот – аферите, досиејата, прислушкувањата, следењата… Единствен логичен заклучок е дека тие институции постапувале спротивно на законите и со самото тоа сториле кривични дела, односно злочини!
Не сум за реваншизам. Реваншизмот секогаш е мотивиран од политички причини. Но кога се работи за флагрантно кршење на законите (демократски – според Уставниот) тогаш не е доволна само лустрација како што е предложена туку кривична одговорност. Забораваш дека како последици од таквиот репресивен систем имаме ликвидација на луѓе, долгогодишни робии, малтертирања…
И ако целта и смислата на лустрацијата е таквите лица (кодоши) само да бидат тргнати од политиката тогаш логично го поставувам прашањето:
А кој ќе ги спречи после 2013 да дојдат пак на функции?
Не заборавај – кодошите од транзициониот период се сеуште млади и витални!
Alexandro
лустрација се однесува на лица активни во политиката а не на отварање на сите досиеја и нивно објавување.
После 1991 година секое кодошење е кривично дело доколку не се работи за вистина. И секое негово прикривање е истотака кривично дело. Затоа и нема потреба од лустрација. Ако знаеш за такво дело со пријава до МВР го решаваш проблемот. А ако некој го крие и тој истотака по нашите закони одговара.
А ако ова потфрла тогаш имаме проблем со системот па е апсурд дека некаков си закон за лустрација ке го реши тоа.
Што се однесува до датумот. Колку што приметив во читањето по нет, во разни земји тоа е решено на различен начин. Во некој е доживотно (што јас лично го сметам за престрого) во некој е до одреден датум како кај нас.
Andrej,
Знам за што се однесува лустрацијата.
Ама она што го наведуваш во продолжение е смешно! Најпрвин од каде ти знаеш дека некој те кодошел. И второ, за што ќе го пријавиш во МВР? За кое дело кога те кодошел на надлежен (со Закон) државен орган? И ти пријавуваш до органот до кој те кодошел и очекуваш преземање мерки или признание?
Дај те молам, не се сите Латас!
Не си јасен за кој датум зборуваш. Оној што јас го споменувам е датумот до кој ќе се спроведува лустрацијата. После тоа оние кодоши кои не биле опфатени со лустрација во овој период, ќе моат слободно да претендираат на највисоки функции дури и јавно да признаат дека биле кодоши!
Тука е проблемот!
Alexandro
лустрацијата нема да донесе кај тебе ништо затоа што со лустрацијата некој политичар ке биде отстранет од политиката и толку. Со законот за лустрација сем морално никој не одговара кривично. Самата лустрација е чин на преиспитување на делата, покајување и прилика или да се извинат или да се повлечат од политика.
Она што јас го говорам е, доколку имаш било каква штета од некое кодошење, тогаш единствен пат до правда е да се тужи истиот и низ судски процес да се докаже неговата кривица.
Што се однесува до датумот, мислам дека е доволен период некој кој си ја има мувата на капата да си замине од политиката, сам и никогаш да не се појави во неа.
Дали си помислил дека со лустрација до 2008 година нема да се појави некој со цело цд податоци за тоа како јас и ти сме кодошеле. Мислиш дека нема да се злоупотребува во пресметка со политичките противници??? Па само тоа е целта на ова померање на лустрацијата до 2008 година.
Видиш, Александро, да тој закон ВООПШТО и не требаше да се разгледува. Фала богу, како што реков, новите кодоши ке им судат на старите. Фала богу, пионите ќе настрадаат.
Која е логиката новиве кодоши да се ставаат во финкција на џелат и да им судат на старите? Демек, овие помали гревови имаат?
Башка, кодош си е кодош, и секогаш ги имало и ке ги има.
Дали власата се спогоди со старите кодоши, од 1991 наваму, со цел да ги заштити своие кодоши?
Фала богу.
И уште една грешка на која можеме ние да се смееме.
Или-да плачеме…
Andrej,
Не го напишав ова за мене лично (имам што да пишувам и без тоа) туку за земјата. Ми изгледа дека не си доволно свесен за опасноста што на носи целата таа полициско – политичка мрежа надополнета со плејада кодоши. Штетата што ја нанесе во овиј период е огромна. За нив е небитна политичката припадност – ги има во сите партии и просто „везат“ на политичката сцена. Си се запрашал ли некогаш на што се должат некои чудни политички (персонални) коалицирања или пак како тоа довчерашни ортодоксни комуњари станаа одеднаш ортодоксни вмровци, или обратно???
Кој ги влече конците, која е основата и причината за таквата трансформација, како им успеваше секогаш да бидат со власта без оглед чија е таа и најважното – како тоа токму тие се секогаш вклучени во најважите државни проекти???
Многу интересни прашања нели?
Мојот интерес тука е ирелевантен!
Сосема друго прашање е валидноста на документацијата но тоа е само еден (секако битен) сегмент на целиот процес на лустрација кој треба(ше) да се спроведе.
Батали кривичен прогон. Знам како помина кривичната пријава што ја поднесов за прислушкувањето на ВМРО – отфрлена со една реченица без збор образложени.
Еве имам докази дека некој ме кодошил. И? За кое дело да го тужам??? И кој гарантира дека МВР ќе потврди дека навистина било така?
Лустрацијата е општествен политичко – праве процес а не персонална битка за исправање неправди.
Надежна,
Така е…
Alexandro
атоа што го говориш е аномалија на нашето општество (се разбира ако е така како што велиш) и тоа не го решаваат сто закона за лустрација.
А можеш ли да замислиш ако е тоа така и ако им се даде уште една алатка за манипулација и пресметка со опоненетите, како тоа ке изгледа.
Баш ме интересира дали парламентарците на ДПМНЕ ке ја прифатат евентуалната измена во одлуката на уставен ако се смени власта и СДСМ дојде на власт. Дали тогаш ке се сложат лустрацијата да биде до 2008.
Да не се правиме наивни, се знае зашто се бара лустрација до 2008. Сигурно не да се средат овие состојби кои ти ги иницираш.
[...] This post was mentioned on Twitter by aleksandar, aleksandar. aleksandar said: Лустрацијата е мртва, Да живее УДБА! Сосе кодошите http://tiny.cc/vtfm1 [...]
Андреј,
Па опфатен е и периодот кога ВМРО ДПМНЕ беше на власт, вклучително и две години од мандатот на сегашната власт. Во еден претходен пост спомнав дека со овој Закон фактички Парламентот призна дека во целиот овој „демократски“ период имало нелегални активности на тајните служби. Така да никој не е поштеден.
Ако ништо друго можеа да научат од искуствата на споменатите земји (Бугарија, Источна Германија, Чешка, Полска) во кои лустрацијата се спроведе практично без поголеми потреси и покрај тоа што нивните системи беа далеку поригидни и порепресивни.
Мислам дека на овој начин тие што сакаа да го минираат овој процес успееја – закон има, желба демек има, резултати ЈОК!
Alexandro
па не сум сигурен дека ке сакаат ваков закон кога власта е во рацете на другите.
Наш човек малверзација ке ти направи, да ти помогне тешко.
Што се однесува до примерите од другите земји. Многу е тешко да се споредува, пред се зашто ние произлеговме од земја што се распадна и систем што се распадна.
Денес многу мислат дека СДСМ се плаши од лустрацијата а забораваат дека токму тие беа на власт во првите години кога никој не ја ни спомнуваше и имаа доволно време да ги исчистат и своите досиеја и досиејата на кого сакаат практично а истовремено да накалемат некому досие.
Затоа целава работа е глупост да се прави после 20 години. Замисли сега српските тајни служби што можат да направат со одредни досиеја кои стојат во белград а никој не ги побарал. Кармакаша државата може да ја направат.
Но за политичко препукување добра тема. Важно е некој да научат што е тоа лустрација.
И да не заборавам. Колку што мене ми е познато ниту една земја нема направено лустрација за периодот откако се сменил системот.
Во бившите ју републики мислам дека законот за лустрација важи од 1976 година кога СФРЈ е потписник на декларацијата за човекови права па до 1991 година.
Не сум сигурен треба да се провери, дали е кај сите вака.
Едно прашање, ако може?
А зошто не може „кодоши“ во Влада, а може „терористи“?
И тоа да се провери дали е кај сите така!
Па нив другар ти Бане ги промовира во борци за човекови права и ги зема во Влада.
Што убаво изгледаше кога запалија цигари на мирот со Аљи!
Словенците не ни спроведоа лустрација Андреј. Таму уште со осамостојувањето се постигна национално единство и помирување! Нешто што требаше да се направи и кај нас. Но желбата за гола власт беше посилна од националниот интерес. Сега тешко се исправаат промашувањата.
Па во словенија не ни имаше кодоши.
Да ги имаше ние до словенките не ке можевме да припариме.
Е ова ти вреди!
Потпишувам под коментарот!
Ете за нешто да се согласиме!
Andrej
Пропуштив погоре да прокоментирам за можностите од малверзации и манипулации со досиејата. Со многу од нив веќе е направено во што и лично се уверив. Токму затоа во Комисијата требаше да бидат вклучени и стручни лица (поранешни припадници на СДБ/ДБК) кои се најкомпетентни да ја оценат веродостојноста и валидноста на секој документ. Со сигурност знам дека многу документи се исчезнати или преиначени.
Но тоа е друга тема и затоа не и посветив поголемо внимание во постот.
Се извинува за насловот: лустрацијата сепак не е мртва!
Следи интернет лустрација – http://makedonium.blog.mk/2010/03/25/policiski-me-obrabotuvale-i-siljan-avramovski-i-slobodan-bogoevski/
Можеби е подобро вака. Јавната осуда е најголема!
[...] кон Груевски како кочничар на фамозната лустрација иако од неа ионака ништо не се очекуваше! Но, затоа пак истата повторно се враќа во игра, [...]
Мала сатисфакција за она што го напишав уште пред неколку месеци и тоа токму од еден од оние кои ги прозвав во текстот.
http://utrinski.com.mk/?ItemID=F73101E476F8D34A9397AFAF8E4D8B00
Никогаш не е доцна…
„Професорот Звонимир Јанкулоски, кој е еден од изготвувачите на Законот за определување на дополнителен услов за вршење на јавна функција, во повеќе наврати јавно се посомнева дека Комисијата нема авторитет за да го спроведе Законот. Според него, „во Комисијата треба да има личности со поголем личен интегритет“. Тој е дециден дека овој концепт на мека лустрација не дава резултати. „Законот има широка политичка поддршка, но само формално. Затоа е неприменлив и не може да се откријат оние што денунцирале. Првичната идеја на Законот не беше таква, текстот во Собранието претрпе измени. Ако сакаме вистинска лустрација, потребен е сосема друг концепт – цврста лустрација и тогаш ќе се види види дали навистина има политичка волја да се спроведе процесот “, смета професорот.“
Доро утро професоре… Уште Доста да ти беше како експерат таман ќе беше!